“Apiiih… kamana atuh isuk-isuk kieu geus rék indit?” Ceuk indungnya barudak nyalukan ti dapur.
“Éta Mih, rék ka imahna Pa Haji Udung, béjana bakal aya raraméan poé ieu. Pa Haji ngayakeun lomba nyandung tingkat désa. Ieu téh nu perdana, cenah mah dibéré judul: Nyandung Award. Hadiahna domba sajodo, meri salosin, jeung bulan madu ka Situ Boléd Gandola tujuh poé tujuh peuting.”
Teuing kumaha mimitina, simkuring jol hayang ngacapruk masalah nyandung. Pedah tadi di jalan, implengan teh ujug-ujug naplok ka si Jang Duljaep, tukang ngangon meri nu boga pamajikan dua. Lainna ngahinakeun ka tukang angon meri, tapi pamajikanna dua, dua deuleu!
Kacaturkeun dina hiji mangsa di salah sahiji kota leutik di tatar Sunda. Harita langit geus katempo semu beureum. Sasatoan geus dikandangan. Barudak nu tadina arulin geus baralik ka imahna masing-masing, pating lalumpatan bangun ku bungah. Sababaraha jalma –lolobana kolot– hiji-hiji mimiti arindit ka masjid. Ngan saeutik pamuda nu katempo masih keneh nalangkring di luar teh.
Recent Comments